Sailburuordearen eskutik etorri zen, hain zuzen ere, hitzaldien irekiera. Bildutako gazte kopurua ikusita, haren "poza" adierazi zuen, "euskararekiko erakusten duten interesa dela-eta". "Euskara 21: itun berritu baterantz" ikerketa azaldu zuen bere mintzaldian Baztarrikak. "Eztabaida zabal" baten ondorioz bildutako ondorioak jasotzen ditu txosten honek. "Gora doan hizkuntza" definitu zuen euskara Sailburuordeak, azken urteetako euskal hiztunen kopuruak gora egin duelako. Ituna osatzen duten 14 ildoak zehaztu zituen Baztarrikak. Ikuspegi guztiak barneratzeko "adostasunik handienaren" aldeko apustua egin zuen. Era berean, euskararen "despolitizazioaren" alde agertu zen eta "malgutasuna eta euskararekiko aldekotasuna" eskatu zien eragile sozial desberdinei.
Eusko Jaurlaritzako Hizkuntza Politikarako Sailburuordetzaren Koordinaziorako Zuzendaria den Erramun Osak eman zuen hurrengo hitzaldia. Euskara indarberritzeko asmoz, Nafarroako Foru Erkidegoko eta Iparraldeko agintaritzekin Euskal Sailburuordeak burutzen dituen lanak azaldu zituen Osak. Euskararen berreskurapena Iparralden izan zen hurrengo mahai-inguruko gaia. Bertan, euskararen irakaspenarekin erlazionatutako Ipar Euskal Herriko adituek parte hartu zuten, hala nola, Erramun Baxo, Euskaltzaindiako Sustapenerako Batzordeko kidea, Paxkal Indo, Seaskako Presidentea eta Jean-Pierre Etcheverri, Ikas-Biren Buruordea.
Bigarren jardunaldian bakea izan zen eztabaida-gaia. Paul Riosek, Lokarriko Koordinatzailea, solasaldia burutu zuen publikoaren partehartzea pizteko asmoz. Eusko Legebiltzarrean ordezkapena duten alderdi politikoen kideak ondoren antolatutako mahai-ingurura gobidatuak izan ziren, non bakea lortzearren jorratu beharko liratekeen bideak planteatu zituen gonbidatu bakoitzak.
Xabier Azanza, Euskarabidearen Zuzendaria eta Joseba Erkizia, HABEko Zuzendaria bildu zituen azken eguneko mahai-inguruak. Nafarroako Foru Erkidegoan euskara irakasteko erabilitako metodoak azaldu zituzten bi partehartzaileek, XIII. Euskal Asteari amaiera emanez. |
